 |
 |
|
|
تانیرسن علی آقا واحده بو دنیاده او بیر دنه زاهده اوتررده می خاننین اوگنده شعر قوشرده شاعرلرین چنگنده اوخیرده هر گلانه گیچانه اینانرده بو گونه یوخ هاجانه؟ بلکه بیره دولدررده جامنه آجه سولان شیرینلرده کامنه بو دنیاده او ایشیی اولمده بوش جیب لری قران پولدن دولمده ایته باته بو دنیادن یوخلده می خانه ی گلان گدان چوخلده دده هر کس من تانرم واحده یا اولمیشم غزل خوانین شاهده هر کس اتی می خاننه زیارت واحد ایچان سودن یاپده طاهرت او زمان که بو دنیادن یوخلارسن اوریلرده یر آچارسن چوخالارسن تانیرسن علی آقا واحده گوره بیلدن غلام حسین ساعده سنده ایله اوله کمین بیره سن بارک الله دییان اولمس دیره سن سید خلیل بو دنیانین جبرده نمونه سی شهریارین قبرده میگلر آدم گلر سنین قبریه حیرت اولسن دیر سنین صبریه گوز دولخسه پارلیر یاشارر سید خلیل آقلاماقه باشارر منین آما دولخانم گوز دییل دانشجاقم ایله بله سوز دییل دولخانم قانن دولی اوریده بوکلانم غم نن چوکان کوریده سید خلیل دیلم یادمنن چخپ آیره دیلی بقزمه زوردن تخپ او یخلان ایترپده دیلمی باسترپده یر آلتنه چیلمی سید خلیل اوز اویده قریب سن ترک دیلنده سایران عندلیب سن اولگ لرده توپ دالنده چاپان وار؟ قوردن ت راق آره کسان قاچان وار؟ بول بولیکین بولاغلری قریپ ؟ سوت یاقجی کلو کالده چریپ؟ سید خلیل آلاداشلق یللده ؟ یاقش یاقسه پلنگ دره سیل ده؟ آدملری بیر گون یقنه چلووه قوی باخسلن اوچقون لره الووه اوته یاندر جلان چخده توی ایله اوپان اوتن بوحک اوجا بوی ایله فتر مسکه بیشرسلن قتابلن سنده قارش او ملته کتابلن بیر آز اوخه اوز دیلنده شعرنه گوی دیشنسه اوز اوزین خیرنه آدملری بیره بیره دانشدر کوکلرینه یکه یکه تانشدر بوش قالپدی شاعرلرین خالته سی پول اولپدی آدملرین ملته سی سید خلیل منه ده بیر جواب یاز وقتین اولسه بش اون دنه کتاب یاز قوز قولاقه اولدزلره تاخان وار عشق آباده قاپلانلدن باخان وار چوخدن اولدی آرامزه سیم چکیپ بیلان وارده او سیملری کیم چکیپ قاچدم گتم بیر گون چاتم او تایه شکر ایتم میگلر کره خدایه هامه بیلر او تایلرده دیلمه هارالدم سندرمدی قیلمه هارایمه ایشتانلر دوشنده تک سورده بله لهجه کمینده ساده دیلده ددم خراسانلیم اوز اوومده قریب اوری قانلیم سید خلیل زمانلری قایتر بیرآز دالنه قوی بیر باخم آداخلمین خالنه اون آلتده یاخشی پیسی قاتردم اون دقزده زندانلرده یاتردم شیرن سوزی یاقشی قزه دمدم آلما کمین اوزلرین یمدم نه تر گچتی سید خلیل اون یده بیر اویاندم اولمیشم ایرمه یده استیرم بیرده اون سکز گلسن دیش گورانده شیرین دیلی قز گلسن دیم اونه آیره لیقین غمنه منن سونره یاشه یاشین چمنه ایستیرسه قزل گولدن عرقچین توکم اننین ساچلرنه اولدوز گون غزل یازم گوزل قره قاشنه آی اولدوزه دولاندرم باشنه بیرده اوپم اوز قوزنه چناقه آقشام چکم ساچلرنه ترقه اونه آلم دسته دسته گولری توکم سونره شیرین شیرین دیلری بلکه گوردین راضه الدی عشقمه پلو سوزدی بوشقابمه هر جمعه سید خلیل ایشلرمز چوخ قن ده تات قوشمز شیطان کمین بیر جن ده لهجه سنه یاقشی سایر هر دیلدن تیکاننه اوستم گورر هر گولدن قره گونه قلدق بله قاردق تات ایچنده ایتق باتق اردق خلقم اولپ یازانلرم یقدی بزه قالان بو غم لرین دقدی هر ملتین اولر ایکی آیاقی بو گوننه توصیف ادر بایاقی بیره اوننین دانشلان دیلده لسان اونین علامته چیلده ایکنجیسه تورپاقده یوردده او تورپاقده قاچده قوده وردده تورپاق ایتسه بیر گون دآله قایترر چکه بیلر بیر آز و چوخدن ضرر دیل ایتلسه ملت تماما باطر گلجیه آخره سونه چاطر عزیز گورین ترکین شیرین دیلنه هر گون توتین اونین دوغان ایلنی غیبت یازسم سید خلیل خوشلیر اوریده دارخماقه بوشلیر برات پری قوز کشمشی قاترده نقل لره یومورتیه ساترده کله قندی کچه کچه بیچاردی قره چای ایسه ایسه ایچاردی باشلیرده یواش یواش نقله آپاردی باشدن هوشه عقله هرایلرده تپه لردن یل کمین آت مینانده دره لرده سیل کمین شاه عباسین کاروانه گچانده کوی قزلری ساچلرینه ساچانده شاهین گوزه بیره سنه سچرده سوه سونره قزل جامنن ایچرده خانین قزه صنم کمین صلودی اونین اره قوجه موجه کلودی باخما اونین بله بهک یاشنه چوتر اوزی توک سز قوتر باشنه اونی سوون صنم آدلی صلودی یاشلندران اونی تمیز قلبدی ایله بله دانشرم باشمه بو دانشماق اوقن دییل یاشمه سید خلیل بیلمییرم نه یازم آدم اولماقدان بله بلکه آزم بیلدم بیلدم بلکه وصیعت بازم آقاچ گمین تورپاقه جله قازم
|
||
|
+
نوشته شده در یکشنبه بیست و هشتم تیر 1388ساعت 3:8 توسط شیروان
|
|
||
|
|
درباره |
|
|
||
|
|
|
|
|
صفحه نخست پست الکترونیک آرشیو وبلاگ عناوین مطالب وبلاگ |
||
|
|
پیوندها |
|
|
افشار خوراسان تورکلری (ترکهای خراسان) |
||
|
|
|
|
|
POWERED BY
BLOGFA.COM |
||